ولادك أمانة ..حتى لو مع أقرب الناس

بقلم / سهير محمود عيد
فى وقت الدنيا فيه اتغيرت ، ما بقاش فى حاجة اسمها أمان مطلق . ساعات المصايب بتحصل من أقرب الناس من اللى بيفتكروا إنهم أهل ثقة . لحظة واحدة بس من التهاون ممكن تسبب أثر كبير فى نفس الطفل ، وجرح يفضل طول العمر .
مش كل قريب يبقى أمين … ومش كل اللى بيبان طيب يبقى آمن . الطفل ضعيف ، وما يعرفش يدافع عن نفسه ، ومسؤوليته كلها فى رقبة أهله .
خلى بالك …مش لازم يحصل شيء عشان نتعلم ، الوقاية أهم الندم .
خلى ولادك دايما تحت عنيكي ما تسيبهمش لوحدهم مع حد حتى لو قريب .علميهم بهدوء إن جسمهم ملكهم ، وإن فى حدود محدش يعديها .
خليكى دايماً متابعة سلوكهم ، أى تغيير بسيط ممكن يكون وراه حاجة .
الأمان الحقيقى مش فى الناس ، الأمان فى وعيك وإنتباهك .
ولادك مش مجرد أمانة …دول حياتك كلها . واللى يضيع منهم حاجة كأنه ضيع عمره كله .
وأخيراً…رب احفظ أولادنا بعينك التى لا تنام ، وازرع فى قلوب الأهل وعياً وحذراً ورحمة .